By: RaY KinZoKu

[Recommend this Fotopage] | [Share this Fotopage]
View complete fotopage

Wednesday, 9-Apr-2008 08:00 Email | Share | Bookmark
ORGHAE KITO : Berghaehii kor Burghong Ti'tteir

Rumah dan Burung, Kok Majid, Tumpat
Rumah dan Burung, Tanjung Chat, Kota Bharu
Tanjung Chat, Kota Bharu
Tanjung Chat, Kota Bharu
Palekbang, Tumpat
Palekbang, Tumpat
.




ORGHAE KITO :
Berghaehii kor Burghong Ti'tteir



( Kesinambungan dari entri yang terdahulu, " Okay, Stand Still and Look At The Birdie !! " )



Erm herm .. lamo weh tok kkae'chaek Kelaté !

Nok ghoyak sor jah.

Lamo doh telittah, lonnih jah barghu nok ttubeik !

Ado sor hok ambo kerghaek nappok bilo kelih kor ghummoh orghae kito, hok duk kappong baik hok teppi jalae.

Kelih punyo kelih, tock sikik jugok hok ado maerggho Burghong Ti'tteir.
Kalu hok jenih berghaehii benaa, bergerghunyut supo kedaa burghong !








Pemandangan biasa di sesetengah rumah di Kelantan khususnya di kampung-kampung, juga di kawasan perumahan di bandar.

Foto dirakam di pekan Tumpat ( atas ) dan Kok Majid ( bawah ), kedua-duanya di Jajahan Tumpat.





Burghong Ti'tteir tu kalu kok basor Kelaté la.

Ejo nyor " K-E-T-I-T-I-R " tapi sebuttae nyor " Ti'tteir ".

( Supo " K-E-T-E-R-E-H " la jugok, namo tepak tu. Orghae panggey " Ttaer-ghae " )

Kalu kok Bahaso Melayu Sekoloh, Bahaso Orghae Luwaa, demo sebok " Merbok ".
Kalu hok kkae'chaek orghae puteh, demo panggey Zebra Dove.
Kalu hok ngajji tinggi sikik gak, demo sebok kok Linnaean taxonomy, Geopelia striata !

Begitulah ado nyor ....






Burghong Ti'tteir atau Ketitir.

Foto dipinjam dari internet.




Demo kato sorgho diyyo sedak.

Sedak kok mano, ambo tock gheti nok ghoyak tapi nyato nyor tock supo Siti Nurhaliza.
Sedak diyyo gak, sapaa orghae sanggup letok ghergo ghibu-ghibu !
Ayae sekilo pong tock sapaa gitummo !

Burghong Ti'tteir nih tepak laing pong ado sebenar nyor. Bukae Kelaté sajo jah.
Darghi alik Siyyae sapaa kor Singapore, pah kor Indonesia mano, demo ado duk mmaing.
Tapi Kelaté tetap dalae kelas hok tersendiri, ado suwasano tersendiri.

Kkae'chaek pasaa hok ado Kelaté nih,
hok ambo kelih sokmo gak, marghi jah pagi Juma'ak, tock pong pagi Sabtu,
sek sek hok mminak nih ppakak kileik sarghae burghong, gi ppadae. Padae bukae supo padae bola weh, padae spesel penuh nga tiyyae bercherghachok guno nyor wak sakuk sarghae burghong. Karghaa naik supo karghaa naik daergho. Ado buwa'tae besi, ado jugok pakaa buloh jah :





Padang Ketitir - Palekbang, Jajahan Tumpat.



Bilo wak nnaik belako, burghong burghong nih mulo la buwwaa, barghghii samo diyyo.
Tuwwae punyor pulok tunggu bowwoh, kelip pah kelip pah duk dengaa, duduk ghama ghama bowok pak ghedup, bowoh pokok, atah gerghae, atah kerghusi mano ado, blae blae kkae'chaek nga gu seangkatae, darghi cerghito burghong pah kor cerghito politik, tubeik belako.

Napok gayo, biso jugok pukullae Burghong Ti'tteir.
Bukae sekak jadi mmaenae, tapi jugok jadi modal bersosial, baik burghong mahu pong tuwae burghong, pah ado jugok jadi barghae betandeing !

Pertandingae diyyo ado hadiyyoh machae machae.
Darghi hadiyoh pitih sapaa laa pialo samo besaa nga tuwaee burghong !
Tu pong kalu lekak la. Kalu wak marghi burghong moyok, kelik derghumoh pong moyok jugok la. Silak harghibulae, bining dumoh pulok " kokkok ".

Kkae'chaek berkena'ae tuh, ado sor nih, kerghajae negerghi sponsor,
wak sekali setahung, sokmo sokmo diyyo buwak dalae maso Pujyo Omor.

Diyyo panggey,

" Pertandingan Seni Suara Burung Ketitir ( Merbok ) Antarabangsa Kelantan ",

boleh sapo sapo nok masuk, tok kirgho marghi cerghuk mano dalae Malaysia, cerghuk mano atah duniyyo ( hok marghi seberghae Golok pong ghamaa ! ). Tepak diyyo tock susoh carghi, Gelanggang Seni Suara Burung Lubok Jong, Jajahae Pasir Mah, tengoh jalae nok gi kor Ghataa Panjae.

Barghu nih ambo ado gi kelih, diyyo buwak 2 April 2008, harghi Rabu :





















Mudoh kato, nok cerghito panjae pong tock guno.
Keno gi kelih sedirghi barghu boleh napok, bakpo gak demo nih berghaehii gitummo mmaing gonnih.

Ambo nga Burghong Ti'tteir ?

Barghu mmargheing dulu ambo teppoh sekor nga kergheto, maso lalu belakae Courts Mammoth.

Nyaknyo diyyo, duk mmaing atah jalae sangak.
Kergheto tengoh laju, diyo pulok duk gelaewak ssituh lagih.
Sapaa dekak benaa barghu nok terghebae gaaaaaaaaaaaaaak ...........

Itulah sahaja kisah ambo nga Burghong Ti'tteir.

Sedih.




KEMASKINI 30 APRIL 2008 : Suara Ketitir RM 200,000



View complete fotopage


© Pidgin Technologies Ltd. 2016

ns4008464.ip-198-27-69.net